Isa 52 | NdeIBE | STEP | Vuka, vuka, wena Ziyoni uzembese ngamandla. Gqoka izigqoko zakho zenkazimulo wena Jerusalema, muzi ongcwele. Ongasokanga longcolileyo akayikungena kuwe futhi.

Isaiah 52

1 Vuka, vuka, wena Ziyoni uzembese ngamandla. Gqoka izigqoko zakho zenkazimulo wena Jerusalema, muzi ongcwele. Ongasokanga longcolileyo akayikungena kuwe futhi.

2 Thintitha uthuli lwakho; sukuma, uhlale ebukhosini, wena Jerusalema. Zikhulule izibopho ezisentanyeni yakho, wena Ndodakazi ethunjiweyo yaseZiyoni.

3 Ngoba nanku okutshiwo nguJehova: “Lathengiswa ngeze, njalo lizahlengwa kungekho mali.”

4 Ngoba nanku okutshiwo nguJehova Wobukhosi: “Ekuqaleni abantu bami baya eGibhithe besiyahlala khona; muva i-Asiriya yabacindezela.

5 “Khathesi kuyini engilakho lapha?” kubuza uJehova. “Ngoba abantu bami bathunjwa kungekho sizatho, njalo labo abababusayo bayakloloda,” kutsho uJehova. “Lebizo lami lithukwa kokuphela ilanga lonke.

6 Ngakho-ke abantu bami bazalazi ibizo lami, ngakho-ke ngalolosuku bazakwazi ukuthi yimi engamemezela lokho ngaphambilini. Ye, yimi.”

7 Yeka ubuhle phezu kwezintaba, bezinyawo zalabo abaletha izindaba ezinhle. Abamemezela ukuthula, abaletha izindaba ezinhle abamemezela insindiso, abathi kulo iZiyoni, “UNkulunkulu wakho uyabusa!”

8 Lalela! Abalindi bakho baphakamisa amazwi abo, bonke bahlaba umkhosi ngokuthokoza. Lapho uJehova ebuyela eZiyoni bazayibona iZiyoni ngamehlo abo.

9 Hlokomani ndawonye ngezingoma zokuthokoza lina manxiwa aseJerusalema, ngoba uJehova usebaduduzile abantu bakhe, uselihlengile iJerusalema.

10 UJehova uzaveza ingalo yakhe engcwele phambi kwezizwe zonke, njalo yonke imikhawulo yomhlaba izabona insindiso kaNkulunkulu wethu.

11 Sukani, sukani, phumani lapho! Lingathinti lutho olungcolileyo. Phumani kulo libe ngabahlambulukileyo, Lina eliphatha izitsha zikaJehova.

12 Kodwa kaliyikusuka ngokuphangisa, kumbe libaleka; ngoba uJehova uzahamba phambi kwenu, uNkulunkulu ka-Israyeli uzakuba ngumvikeli wenu ngasemuva.

Ukuhlupheka Lodumo Lwenceku

13 Khangelani, inceku yami izakwenza ngokuhlakanipha, izaphakanyiswa ikhwezwe, iphiwe lodumo olukhulu.

14 Njengoba babebanengi abanengwayo yiyo – ubuso bayo babulimele okudlula okwabantu bonke, lesimo sayo sonakele singase njengesomuntu –

15 ngakho-ke izachela izizwe ezinengi, amakhosi azavala imilomo yawo ngenxa yayo. Ngoba lokho abangakutshelwanga bazakubona, labangakuzwanga, bazakuqedisisa.